يقول الشيخ شالح في أخاه ( الفديع )
لا واخو لي عقب فرقاه باضيع = كني بما يجري على العمر داري
اخوي ياستر البني المفاريع = ومطلق لسان الى باهلها تماري
ماقط يوم شد بين الفراريع = ياكود مابين الكمي والمشاري
ليته عصاني مره قال ماطيع = كود اني اصبر يوم تجري الجواري
انا اشهد انه لي سريع المنافيع = عبد مليك لي ولاني بشاري
تشهد عليه مناتلات المصاريع = وعداه من كفه تشوف العزاري
يمناه تنثر من دماهم قراطيع = وعوق العديم اللي بدمه يثاري
جداع سفيرين الوجيه المداريع = مخلي سروج الخيل منهم عواري
القلب ماينسى بعيد المناويع = ليث على صيد المشاهير ضاوي
ويقول شالح في رثاء اخاه ( الفديع ) بعد ان قتل في احدا المعارك بينه
وبين الحمده امراء عتيبه
أمس الضحى عديت روس الطويلات = وهيضت في راس الحجا ماطرا لي
وتسابقن دموع عيني غزيرات = وصفقت بالكف اليمين الشمالي
وجريت من خافي المعاليق ونات = والقلب من بين الصناديق جالي
وا أخوي ياللي يم قارة ( جفا ) فات = من عاد من عقبه بيستر خمالي
ليته كفاني سو بقعا ولا مات = وانا بكفيه سو قبر هيالي
وليته مع الحيين راعي الجمالات = وانا فدا له من غبون الليالي
وا أخوي ياللي يوم الأخوان فلات = من خلقته ماقال ذا لك وذا لي
تبكيه هجن تالي الليل عجلات = ترقب وعدها يوم غاب الهلالي
وتبكي على شوفه بني عفيفات = من عقب فقده حرمن الدلالي
عوق العديم ان جا نهار المثارات = والخيل من حسه يجيهن جفالي
وقال شالح ردا على ضيف الله العفار بعدما قال قصيده يرثي فيها اخاه
عبيد الذي قتله مبارك هدلان
احد اقارب شالح قضاءا للفديع
ضيف الله اشرب ماشربنا مراره = اصبر وكنك شالح يوم حزن
راح الفديع اللي علينا خساره = واخذ قضاه عبيد حامي ثقلهن
يمنى رمت به ماتجيها الجباره = اللي رمت بعبيد في معتلجهن
من نسل ابوي وضاري للشطاره = يصيب رمحه يوم الارماح يخطن
وعبيد خللي طايح بالمعاره = عليه عكفات المخالب يحومن
وعاداتنا بالصيد ناخذ خياره = ثلاثة الجذعان غصبن بلا من
ياقاطع الحسى ترى العلم شاره = لابد دورات الليالي يدورن
حريبنا كنه رقيد الخباره = خطر عليه اليا توقظ من الجن
ماني بقصاد بليا نماره = أجدع نطيحي بالسهل وان تلاقن
من حل دار الناس حلوا دياره = لابد ماتسكن دياره ويغبن
ومن شق ستر الناس شقوا ستاره = ومـن ضحك بالثرمان يضحك بلاسن
وان كان ضيف الله يعسف مهاره = فمهارنا من عصر نوح يطيعن
تدنا لصبيان سواة النماره = شهب لماضين الفعايل يعنن
قال شالح وقد غضب من جماعته لانهم اجتمعوا لمناقشة امور القبيله ولم
يدعوه
أنا ليا كثرت لشاوير ماشير = وحلفت ماتي بارز ما دعاني
وانا خويه في الليالي المعاسير = والا الرخا كل يسد بمكاني
وشورى ليا هجت توالي المظاهير = شلفا عليها رايب الدم قاني
شلفا معودها لجدع المشاهير = يوم السبايا كنها الديدحاني
ماني بخيل ما يعرف المعابير = قدني على قطع الفرج مرجعاني
ان سندوا حدرت يم الجوافير = وان حدروا سندت لمريغاني
ناخذ بخيران المريبخ مسايير = وما دبر المولى على العبد كاني
وقال شالح وقد كان يحس ان شجاع مثل ولده ذيب لن يطول عمره لان ذيب كان
شجاع مغامر
بفروسيته وكان شالح يدعوه في المجلس امام جماعته ويقبل راسه ويبكي
فلامه جماعته كيف
يفعل هذا ويبكي فقال
ماذكر به حي بكى حي ياذيب = واليوم انا بابكيك لو كنت حيا
وياذيب يبكونك هل الفطر الشيب = ان لايعتهم مثل خيل المحيا
وتبكيك قطعان عليها الكواليب = وشيال حمل اللي يبون الكفيا
وتبكيك وضح علقوها دباديب = ان رددت من يمة الخوف عيا
ويبكيك من صكت عليه المغاليب = ان صاح باعلى الصوت ياهل الحميا
ننزل بك الحزم المطرف لياهيب = ان رددوهن ناقلين العصيا
انا اشهد انك بيننا منقع الطيب = والطيب عسر مطلبه ما تهيا
وقال شالح وقد راى ابل وتمناها ان تكون له فقال هذه القصيده يوجهها
لولده ذيب
ياذيب انا يابوك حالي تردا = وانا عليك من المواجيب ياذيب
تكسب لي اللي لا قحن عقب عدا = طويله النسنوس حرشا عراقيب
تجر ذيلن مثل حبل المعدا = وتبرى لحيران صغارن حباحيب
واشري لك اللي ركضها ما تقدا = ماحدن لقى فيها عيوب وعذاريب
قبا على خيل المعادي تحدا = مثل الفهد توثب عليهم تواثيب
انا اشهد انك باللوازم تسدا = وعز الله انك خيره الربع بالطيب
ياللي على ذيب السرايا تعدا = لو حال من دونه عيال معاطيب
ليثن على درب المراجل مقدا = ما فيك يا ذيب السبايا عذاريب
وبعد مقتل ذيب قال شالح يتألم على فقدان ابنه
ياربعنا ياللي على الفطر الشيب = عز الله انه ضاع منكم وداعه
رحتوا على الطاعات مثل العياسيب = جيتوا وخليتوا لقلبي بضاعه
خليتوا النادر بدار الاجانيب = وضاقت بي الافاق عقب اتساعه
يكدرن لي صافيات المشاريب = وبالعون شفت الذل عقب الشجاعه
ياذيب أنا بوصيك لاتاكل الذيب = كم ليلة عشاك عقب المجاعه
كم ليلة عشاك حرش العراقيب = كم شيخ قوم كزته لك ذراعه
كفه بعدوانه شنيع المضاريب = ويسقي عدوه بالوغى سم ساعه
ويضحك ليا صكت عليه المغاليب = ويلكد على جمع العدو باندفاعه
وبيته لجيرانه يشيد على الطيب = وللضيف يبني في طويل الرفاعه
جرحي عطيب ولا بقى لي مقاضيب = وافخت حبل الوصل عقب انقطاعه
كني بعد فقده بحامي اللواهيب = وكني غريب الدار مالي جماعه
من عقب ذيب الخيل عرج مهاليب = ياهل الرمك ماعاد فيهن طماعه
قالوا تطيب وقلت وشلون ابا طيب = وطلبت من عند الكريم الشفاعه
وقال شالح يتندم لانه قال لابنه ذيب ان يأتي له بالابل وكان ذلك سبب
موته
ذيب عوى وانا على صوته اجيب = ومن ونتي جضت ضواري سباعه
عز الله اني جاهل مااعلم الغيب = والغيب يعلم به حفيظ الوداعه
يالله يا رزاق عكف المخاليب = يامحصي خلقه ببحره وقاعه
تفرج لمن صابه جروح معاطيب = وقلبه من اللوعات غاد ولاعه
ان ضاق صدري لذت فوق المصاليب = مانيب من يشمت فعايل ذراعه
صار السبب مني على منقع الطيب = ونجمي طمن بالقاع عقب ارتفاعه
ياطول ما هجيتهن مع لواهيب = ولاني بداري كسرها من ضلاعه
وياطول مانوختها تصرخ النيب = وزن البيوت اللي كبار رباعه
واضوي عليهم واتخطى الاطانيب = واخذ مهاوية الجمل باندفاعه
ابا انذر اللي من ربوعي يبا الطيب = لاياخذ الا من بيوت الشجاعه
يجي ولدها مذرب كنه ( الذيب ) = عز لبوه وكل ما قال طاعه
وبنت الردي ياتي ولدها كما الهيب = غبن لبوه وفاشله بالجماعه
وقال شالح بعد ان سمع بوفاة الشيخ محمد بن هندي رغم الثارات بينهم ولكن
دائما الشجاع لايريد للشجاع
الاخر الموت
يانجد عقب محمد كيف بتقول = مرحوم ياشيخ السلف والجهامه
فتال ماينقض ونقاض مفتول = والى سعى بامر مشى في تمامه
وان جاه مظيوم من الحمل متلول = حطه سمين ويبترم في سنامه
عساه في الجنات عرض مع طول = في جنة الفردوس تبني خيامه
